အဟာရလည်းဖြစ် ဝိတ်လည်းကျစေမယ့် အစားအစာကိုးမျိုး

အဟာရလည်းဖြစ် ဝိတ်လည်းကျစေမယ့် အစားအစာကိုးမျိုး

အဆီအစိမ့်တွေ စားနေသရွေ့တော့ ဒီဝိတ်ကြီးက သိကြားမင်းဆင်းချတာတောင် မကျနိုင်ပါဘူးနော်။လေ့ကျင့်ခန်းသာလုပ်နေရတာ ဝိတ်ကလည်းကျမလာ၊ လူကလည်းပိန်မလာ၊ အချိန်ကုန်လူပန်းရုံကလွဲ ဘာမှဆက်မဖြစ်လာတော့ စိတ်ကုန်ပြီလေ။

ဒါဆို နှင်းကအနီးစပ်ဆုံး ပြဿနာကို မှန်းပေးမယ်။ Gym ဆော့တယ်နော်၊ ပြန်လာတယ် လမ်းမှာတွေ့သမျှမုန့်တွေ ဝယ်စားတယ်။ဗိုက်ဆာတယ်နော် ထမင်းကို ဇလုံလိုက် အနှစ်တွေ၊ အဆီတုန်းတွေ ဘာမှမရှောင်ဘဲအကုန်ကျိတ်တယ်။

ကျပါလိမ့်မယ် (ဝိတ်တော့မဟုတ်ဘူး စိတ်ဓာတ်ကျမှာ)။ဒါပေမဲ့ အစားလည်းလျှော့ လေ့ကျင့်ခန်းလည်းလုပ်ရင် အာဟာရပြတ်ပြီး မူးလဲသွားမှာပေါ့လို့ ဇောတကတက်မယ့် ယောင်းယောင်းတို့အတွက်လည်း နှင်းက အမြန်ဆုံးဝိတ်လည်းကျပြီး အာဟာရဖြစ်စေမယ့် အစားအစာ (၉) မျိုးကို အခုရေးပြမှာပေါ့။

၁။ ကြက်ဥ – အရင်တုန်းကတော့ ကြက်ဥကို အနှစ်စားရင် ဝိတ်တအားတက်တယ်ဆိုပြီး အကာပဲစားခဲ့ကြတယ်မလား။ဒါပေမဲ့ နောက်ထပ်လုပ်တဲ့သုတေသနတွေအရ ကြက်ဥမှာ အာဟာရဓာတ်တွေ

အများကြီးပါဝင်တဲ့အပြင် တခြားအဆီတက်စေတဲ့ အစားအစာတွေလို ကိုယ်လ်လက်စတောတွေကလည်း သွေးထဲကိုမရောက်သွားတာမို့ အဆီမဖြစ်သွားဘဲ အားအင်ပဲဖြစ်နေမှာပါ။

၂။ အစိမ်းရောင်အရွက်တွေ -ဟင်းနုနွယ်ရွက်၊ ကိုက်လံ၊ အစိမ်းရောင်ဂေါ်ဖီထုပ် စတဲ့အစိမ်းရောင်အရွက်တွေမှာ ဘယ်လောက်စားစား ကယ်လိုရီမတက်ဘဲ တခြားခန္ဓာကိုယ်အတွက်

လိုအပ်တဲ့ဓာတ်တွေ၊ဗီတာမင်တွေနဲ့ Fibre လို့ခေါ်တဲ့ အမျှင်ဓာတ်တွေပဲ အများဆုံးပါဝင်တာမို့ သတိရတိုင်းထားစားလည်း ဝိတ်မတက်ဘဲ အကျိုးရှိမှာပါ။

၃။ဆယ်လ်မွန်ငါး -အိုမီဂါ 3 လို့ခေါ်တဲ့ ကျန်းမာရေးနဲ့ ညီညွတ်တဲ့အဆီ ကြွယ်ဝစွာပါဝင်နေပြီး ခန္ဓာကိုယ်ရဲ့ ဇီဝဖြစ်စဉ်တွေကို အမြင့်ဆုံးဖြစ်အောင် စွမ်းဆောင်ပေးနိုင်တာမို့ ကိုယ်အလေးချိန်ကျဖို့ အထိရောက်ဆုံးကူညီပေးနိုင်တဲ့ အစားအစာတွေထဲက တစ်ခုပါပဲ။

၄။အမဲသားနဲ့ ကြက်ရင်ပုံသား – ကိုယ်အလေးချိန်ကျဖို့အတွက် တစ်ချို့တွေက အသားတွေကို လုံးဝရှောင်ကြတယ်။ အနီရောင်အသားတွေက ကျန်းမာရေးနဲ့မညီညွတ်ဘူးလို့ အဆိုရှိခဲ့ကြတာကိုး။

ဒါပေမဲ့ အမှန်တော့ လူတွေရဲ့ ခန္ဓာကိုယ်မှာ တစ်နေ့တာလိုအပ်တဲ့ ကယ်လိုရီပမာဏလိုအပ်ပါတယ်။အဲ့ဒီထဲမှာမှ ပရိုတင်းဓာတ်က မပါမဖြစ်လိုအပ်တာမို့ ဒီအသားနှစ်မျိုးကိုတော့ ကိုယ့်ရဲ့ထမင်းဝိုင်းမှာ ထည့်ဖို့လိုကိုလိုအပ်ပါတယ်။

၅။ ပြုတ်ထားတဲ့ အာလူး၊ ကန်စွန်းဥ -အဖြူထည်ပြုတ်ထားတယ့် အာလူး၊ ကန်စွန်းဥတွေမှာ ပိုတက်ဆီယမ်ဓာတ် များစွာပါဝင်ပြီး အာဟာရနဲ့ ကာဗွန်ဟိုက်ဒရိတ်ဓာတ်တွေလည်း ပြည့်ဝစွာပါဝင်တာမို့ ထမင်းအစားထိုး အာဟာရဖြည့် အစားအစာလည်းဖြစ်ပါတယ်

၆။ ပဲအမျိုးမျိုး -ပဲကြီးတို့၊ ပဲပြုတ်တို့ကတော့ မပါမဖြစ်အစားအစာတွေပေါ့။ ပရိုတင်း၊ ဖိုင်ဘာ စတဲ့ဓာတ်တွေအပြင် အာဟာရလည်းဖြစ်စေတာမို့ နေ့လည်နေ့ခင်း သရေစာအတွက်လည်း တခြားမုန့်တွေအစား ထိုင်ဝါးနေလို့အဆင်ပြေပါတယ်။

၇။ အသီး – ယောင်းတို့သိကြတယ့်အတိုင်း အသီးက ကျန်းမာရေးအတွက်အရမ်းကောင်းပါတယ်။ ဒါ့အပြင်သူ့မှာပါတဲ့ သဘာဝသကြားဓာတ်က ခန္ဓာကိုယ်အတွက် လိုအပ်တဲ့ အချိုဓာတ်ကိုလည်း ဖြည့်ပေးတာမို့ နေ့တိုင်းစားသင့်တဲ့ အစားအစာစာရင်းထဲ ထည့်ထားသင့်ပါတယ်။

၈။ သံလွင်ဆီ၊ အုန်းဆီ -ထမင်းဟင်းတွေ ချက်တဲ့အခါ ပဲဆီ၊ စားအုန်းဆီတွေသုံးမယ့်အစား အုန်းဆီ၊ သံလွင်ဆီကို သုံးပေးရင် အသည်းအဆီဖုံးတာ၊ ခန္ဓာကိုယ်မှာ မလိုအပ်တဲ့အဆီတွေမတရားတက်လာမယ့်အန္တရာယ်ကနေ ကာကွယ်ပေးပြီးသားဖြစ်မှာပါ။ (ဒီအတိုင်းထိုင်စားလို့မရဘူးနော်။ အစားထိုးဆီအနေနဲ့ သုံးရမှာ။)

၉။ ပန်းသီးရှာလကာရည် – ပန်းသီးရှာလကာရည် ကတော့ ဒီအတိုင်းတော့ ဘယ်သောက်လို့ရမလဲ။ အသုပ်တွေထဲထည့်မယ်၊ တချို့လူတွေကတော့ ရေနဲ့ရောပြီး သောက်ပါတယ်တဲ့။ (အူနံရံတွေပါးတတ်လို့ ဒါကိုတော့အားမပေးဘူး။)

ပန်းသီးရှာလကာရည်ရဲ့ အားသာချက်ကတော့ ကယ်လိုရီတအားများတယ့် အစားအစာတွေကို စားနေပြီဆိုရင် အသုပ်ဖြစ်ဖြစ် တစ်ခုခုမှာဒါလေးကို နည်းနည်းထည့်စားပေးရင် ကယ်လိုရီ ၂၀၀ – ၃၀၀ လောက်လျော့သွားစေပါတယ်။

သွေးထဲက အဆီတွေကိုလည်း စစ်ထုတ်ပေးတာမို့ ရေရှည်မှာ ကျန်းမာရေးအတွက် တော်တော်ကောင်းစေမှာပါ။ကိုယ့်ရဲ့ နှစ်ပေါင်းများစွာက စုလာတယ့် အဆီတွေပြိုကျ၊ ဝိတ်ကျပြီး လှလှပပဖြစ်သွားဖို့ဆိုတာ အရင်းအနှီးတအားကြီးပါတယ်။

စားနေကျပုံစံအတိုင်း ဆက်စားနေမယ်ဆိုရင်တော့ ဘယ်လောက်လေ့ကျင့်ခန်းလုပ်လုပ် ကျန်းမာတဲ့ ဝက်ကနေ ဂေါ်ဇီလာဘဝပြောင်းသွားရုံကလွဲပြီး ဘာမှဆက်ဖြစ်လာမှာမဟုတ်လို့ ကျန်းမာစွာစားသောက်နေထိုင်ဖို့ အင်မတန်မှအရေးကြီးပါတယ်။

ဒါကြောင့် အဆီအစိမ့်တွေကို လျှော့နိုင်သမျှလျှော့ပြီး ကျန်းမာရေးနဲ့ညီညွတ်တယ့် အစားတွေကို များများစားဖို့ တိုက်တွန်းလိုက်ရပါတယ်ရှင်။

Credit