ကမ္ဘာ့ရွှေဈေးတက်ခြင်းကို အကြောင်းပြု၍ ပြည်တွင်းရွှေစျေးကွက်အတွက် YGEA ၏ထုတ်ပြန်ချက်
ပြင်ပရွှေဝယ်ရောင်းများမှကမ္ဘာ့ရွှေဈေးတက်ခြင်းကို အကြောင်းပြု၍ ပြည်တွင်းဈေးကွက်အတွင်း လုယက်ဝယ်ယူခြင်းမျိုး မပြုလုပ်ရန် မေတ္တာရပ်ခံထားကြောင်း ရန်ကုန်တိုင်းရွှေလုပ်ငန်းရှင်များအသင်းက ထုတ်ပြန်ထားသည်။
အမေရိကန်ရှိ ဘဏ်တခု ဒေဝါလီခံလိုက်ချိန်ကစပြီး ကမ္ဘာရွှေဈေးသည် တဟုန်ထိုးတက်နေကြောင်း၊ ကမ္ဘာ့ရွှေဈေးမြင့်တက်နေသော်လည်း မြန်မာနိုင်ငံ၏ငွေဈေးသည်ပြောင်းလဲခြင်းမရှိသည့်အတွက် ဈေးကွက်အတွင်းလုယက်ဝယ်ယူခြင်းမျိုးမပြုလုပ်ရန် အသိပေးထားခြင်းဖြစ်သည်။
ယင်းအပြင် ရွှေဈေးတအားမြင့်တက်ခဲ့ပါက ရွှေဈေးအတက်အကျ မကြမ်းအောင်အသင်းအနေဖြင့် ထိန်းကြောင်းပေးရန်၊အသင်း၌ လေကစားခြင်းလုံးဝခွင့်မပြုကြောင်း၊ယခင်ကလည်းခွင့်မပြုခဲ့သလို ရှိလည်းမရှိခဲ့ကြောင်း၊ရွှေအရောင်းအဝယ်ကိုရွှေထိငွေထိသာ လုပ်ကြရမည်ဟု ထုတ်ပြန်ချက်တွင် ဖော်ပြထားသည်။
ပြင်ပတွင် ဈေးကစားမှုများ ရှိခဲ့ပါကအသင်းအနေနှင့် ခွင့်မပြုသလိုတာဝန်ယူမည်မဟုတ်ဘဲ ဈေးကစားသူများ၏ တာဝန်သာဖြစ်ကြောင်း၊အသင်းအနေဖြင့် ချမှတ်ထားသော စည်းကမ်းများနှင့်အညီအသင်းသားအားလုံးသည်လည်း အသင်း၏ စည်းမျဉ်းအတိုင်း အားလုံးရောင်းဝယ်နေတာဖြစ်သည့်အတွက်
အချိန်အခါအလိုက် ထုတ်ပြန်သည့် သတိပေးချက်များကိုလဲ လိုက်နာကြရန် တောင်းဆိုထားသည်။ယခုပြင်ပရွှေဈေးကွက်တွင်အရောင်းအဝယ်ပြုလုပ်နေကြသောဈေးနှုန်းမှာ လေပတ်ကားသမားများ၊ ဈေးကစားသူများ၏ ပါးစပ်တွင်သာဈေးမြင့်တက်နေခြင်းဖြစ်ပြီး
၎င်း ပုဂ္ဂိုလ်များအား သက်ဆိုင်ရာဌာနအဖွဲအစည်းများဘက်မှ တားဆီးထိန်းသိမ်းရန်ဆောင်ရွက်လျက်ရှိကြောင်း သိရသည်။မတ်လ (၂၁)ရက်ယနေ့ ကမ္ဘာ့ရွှေဈေးမှာ တစ်အောင်စလျှင် ၁၉၈၂ ဒေါ်လာဖြစ်ပြီးအသင်း၏ရည်ညွှန်းဈေးနှုန်းမှာမီးလင်းရွှေတစ်ကျပ်သားလျှင် ၂၃၃၅၀၀၀ ရှိကာ ပြင်ပဈေးကွက်တွင် သိန်း ၃၀ နီးပါးအထိ မြင့်တက်နေကြောင်းသိရပြီး
မတ်လ(၂၁)ရက်ယနေ့ မနက်(၁၀:၃၀)နာရီအချိန်တွင် ပြည်တွင်းရွှေစျေး ၁၆ ပဲရည် ရောင်းစျေး ၂၉၇၀၀၀၀/-ကျပ်၊ဝယ်စျေး ၂၉၄၀၀၀၀/-ကျပ်နှင့် ၁၅ပဲရည်ရွှေစျေး ၂၇၇၀၀၀၀/-ကျပ်အရောင်းနှင့် ၂၇၀၀၀၀၀/- ကျပ် အဝယ်ဖြစ်ကြောင်း သိရှိရပါသည်။
