ထိုင်းစတိုင်ဂဏန်းသင်္ဘောသီးထောင်း နှင့် ထိုင်းမုန့်တီထောင်းနည်း
ယိုဒယားဂဏန်းသင်္ဘောသီးထောင်း
ပါဝင်ပစ္စည်းများ
၁။သင်္ဘောသီး ခြစ်လက်တဆုပ်စာခန့်
၂။မုန်လာဥနီခြစ်သင်္ဘောသီးခြစ်ရဲ့ငါးပုံတစ်ပုံခန့်
၃။ဂဏန်းအကောင်ကြီးကြီး ၁ ကောင်
၄။ပဲတောင့်ရှည်၁တောင့်
၅။ခရမ်းချဉ်သီး၁လုံး
၆။သံပုရာသီး၁လုံး
၇။ထန်းလျက်ခဲ၂ခဲ
၈။ပုဇွန်ခြောက်၁ဇွန်း (ထမင်းစားဇွန်း)
၉။မြေပဲဆားလှော်-၁ဇွန်း(ထမင်းစားဇွန်း)
၁၀။ငရုတ်စိမ်းတောင့်နှင့်အနီတောင့်-၃ တောင့် မိမိနှစ်သက်သလို)
၁၁။ကြက်သွန်ဖြူ ၂တက်(အခွံမချွတ်ရသေးတာပိုမွှေးပါတယ်)
ပြုလုပ်နည်း
ဂဏန်းတစ်ကောင်ကိုရေသေချာဆေးပြုတ်ပြီးစားလို့အဆင်ပြေရုံထုထောင်းထားပါ။အစိမ်းကြိုက်တတ်ရင်ပြုတ်စရာမလိုပါ။
ဂဏန်းကလတ်ဆတ်ဖို့တော့လိုပါတယ်။သင်္ဘောသီးကိုခြစ်ထားပါ။ကျွတ်ကျွတ်လေးနဲ့တောင့်တောင့်လေးစားချင်ရင်တော့စိတ်ရှည်ရှည်နဲ့အမျှင်သေးသေးလေးဖြစ်အောင်လှီးထားပါ။
သင်္ဘောသီးမျှင်တွေကို ရေခဲရေစိမ်ထားသို့မဟုတ်ရေခဲသေတ္တာထဲ၁နာရီလောက်ထည့်ထားပါ။ပွဲပြင်ဆင်တော့မယ်ဆိုငရုတ်ဆုံထဲထမ်းလျက်ခဲတွေကြေအောင်အရင်ထောင်းပါ။
ပြီးနောက်ဖယ်ထားပါ။နောက်ကြက်သွန်ဖြူ၊ငရုတ်သီးစိမ်းနှင့်အနီတောင့်တွေကိုမညက်တညက်လေးထောင်းထားပါ။
သံပုရာသီးကိုအူတိုင်ထုတ်၊၃စိတ်လှီးပြီးအရည်ရော သံပုရာသီးအခွံတွေပါထည့်ထောင်းပါ။ခုနကဖယ်ထားတဲ့ထန်းလျက်ခဲအကြေတွေထည့်ပါ။
ဂဏန်းတွေကို ထည့်ပါ။သံပရာရည်နဲ့သမအောင်မွေပေးခြင်းဖြင့် အသားတွေကျက်ပါလိမ့်မယ်။
ပဲတောင့်ရှည်ကို လက်တဆစ်ခန့် လှီးဖြတ်ထည့်ပါ၊ခရမ်းချဉ်သီးကိုခပ်ကြမ်းကြမ်းလှီးထည့်ပါ။ပုဇွန်ခြောက်ထည့်ပါ။
လက်တဘက်ကဇွန်းကိုင်၊တဘက်က ကျည်ပွေ့ကိုင်ပြီးအားလုံးကိုထောင်းရုံပြု (ပွတ်ချေ)ပေးပါ။နောက်ဆုံးခြစ်ထားတဲ့ သင်္ဘောသီးနဲ့မုန်လာဥနီတွေထည့်ပြီးသမသွားအောင်ပွတ်ချေပေးပါ။
နှံ့ပြီဆိုမြည်းကြည့်ပြီး အပေါ့အငံလိုချင်တဲ့အတိုင်းဆား၊ငါးငံပြာရည်၊အချိုမှုန့်နှစ်သက်ရာထည့်ပါ။နောက်ဆုံးမှာမြေပဲဆားလှော်အခွံချွတ်ထားတာလေးတွေဖြူးထည့်ပါ။
ရေခဲစိမ်ထားတဲ့ကန်စွန် ရိုးနီ ပဲတောင့်ရှည်၊ဂေါ်ဖီထုပ်လတ်လတ်ဆတ်ဆတ်လေးတွေနဲ့တွဲဖက် စားသုံးကြည့်ရင်အရသာထူးတဲ့ဂဏန်းသင်္ဘောသီးထောင်းစစ်စစ်ကိုစားနိုင်ပါပြီ။(ထိုင်းလူမျိုးတွေကသင်္ဘောသီးထောင်းကို ကောက်ညှင်းပေါင်း၊ ကြက်ကင်(သို့)ကြက်ကြော်တို့နဲ့တွဲဖက်စားသုံးလေ့ရှိကြပါတယ်။)ပင်လယ်စာနဲ့လည်းထောင်းလို့ရသလို ရိုရိုးလည်းထောင်းစားကြပါတယ်။
ထိုင်းမုန့်တီထောင်းပြုလုပ်နည်း
ပါဝင်ပစ္စည်းများ
၁။မုန့်တီဖတ်
၂။ငရုတ်သီးအနီတောင့်(အနီတောင့်သုံးပေးမှ အရောင်လှတာပါ)
၃။မြေပဲလှော်အနည်းငယ်
၄။ထန်လျက်
၅။ခရမ်းချဉ်သီး
၆။ပဲတောင့်ရှည်
၇။ထိုင်းငပိရည် (သို့) ရိုးရိုးငပိကိုမီးကင်ပြီးအရည်ဖျော်ထားပေးပါ)
၈။ ငံပြာရည်အနည်းငယ်
၉။ပုဇွန်ခြောက်မှုန့်အနည်းငယ် (ဟင်းချိုမှုန့်သုံးက ထည့်နိုင်သည်)
၁၀။သံပုရာသီး
ပြုလုပ်နည်း
ငရုတ်သီးအနီတောင့်ကိုနွမ်းရုံသာပြုတ်ပေးပါ။ (မပြုတ်ရင်ဗိုက်နာမှာစိုးလို့ပါ) ပြုတ်ထားသောငရုတ်အနီတာင့်မြေပဲအနည်းငယ်နှင့်ထန်းလျက်အားကျေညက်အောင်ထောင်းထားပါ။
ခရမ်းချဉ်သီး၊ပဲတောင့်ရှည်သီးနှင့်သံပုရာသီးလှီးထားပေးပါ။မုန့်တီဖတ်ပေါ်သို့ အပေါ်မှထောင်းထားသောအရာများထည့်ပါ။ လှီးထားသောခရမ်းချဉ်သီး၊ပဲသီးလည်းထည့်ပါ။
ထိုင်းငပိရည် ပုဇွန်ခြောက်မှုန့် ငံပြာရည်အနည်းငယ်သံပုရာသီးညှစ်ပေးပြီးနယ်ပေးပါ။(ထောင်းသည့်ငရုတ်ဆုံရှိပါကအသာလေးလိမ့်ထောင်းနိုင်ပါသည်)ထို့နောက်အရသာအစပ်အငန်အားမြည်းကြည့်ပြီးလိုအပ်သလိုပြင်ဆင်ပြီးစားနိုင်ပါပြီနော်။
ဖိုလ်တိုခရက်ဒစ်
